Kala Rai (कला राई)
प्रिय मान्छे
यो धर्तीको सवैभन्दा
नयाँ गीत गाएर
सम्झनाको सवैभन्दा पुरानो
प्रेम सन्देश बोकेर
उडिरहने प्रिय बादल
र
मेरो प्रियतमको अनुहार
आइरहन्छ आँखामा एकसाथ |
समयलाई चुनैति दिएर दौडने
इलेक्ट्रोनिक रेल
आकाशको रङ्ग सरेको
नीलो समुद्र
ठूला सुपर मार्केटका
विभिन्न लेटेस्ट मोडेलका
खाना, लुगा र आधुनिक उपकरण
कतै अडिदैन
टाइम स्क्वायरको
समय सूचक घडीमा समेत
यो मन |
पहाडका चौतारीमा
मिल्न आइपुग्ने
दूइतर्फी बाटाहरू
दुई नदीहरूको संगम
दुई फूलहरूको
उस्तै सुवास बोकेर
हिडिरहेछौ टाढा—टाढा
एक्ला—एक्लै हामी |
तर पनि
धर्तीको अर्कै कुनामा
उभिएको मेरो प्रियतम
म
तिमीलाई पठाइरहेछु
मेरो आँखाभरीको सपना
मेरो मुटुको रङ्ग मिसिएको माया
अनि
धर्ती र बादलबीच
फुलिरहने प्रेमको फूल ।
No comments:
Post a Comment