Kanchan Pudasaini (कञ्चन पुडासैनी)
नयाँ नायिका
उपमा पनि हिँडिछ
उपमा उसको नाउँ थियो
तर, यस शब्दले
उसको आकारप्रकार ल्यायो
आँखासहित अनुहार ल्यायो
नत्र यसको कुनै मानमहिमा हुँदैनथ्यो
मानौँ सुने न जानेको कोही परदेशी शब्द
जसको कुनै नागरिकता छैन र
कुनै माइती-मावली छैन
गोठ छैन, हवेली छैनन्
सहचर छैन, सहेली छैनन् ।
किन्तु उसको नाउँ अहिले
सशरीर ऊ बनी उभिन आयो
जो भर्खरै चियाउन पो लागेकी थिई र
मुस्कुराएर पनि भागेकी थिई
ऊ अवश्य नै त्यति छिप्पिएकी थिइन है
तर, हिजो ऊ कसैसँग उडिछ
सायद भित्रभित्रै बढिछ ।
No comments:
Post a Comment