Tanka Subba (टंक सुब्बा)
समय

समय अविरल आइरहन्छ
विना मुहानको पानी जस्तो
पर्खदैन डुवी जाने घाम जस्तो
प्रक्रितिले प्रदान गरेको निशु:ल्क उपहार
प्राप्त भैरहन्छ
बाँच्नको लागि प्राण जस्तो
तर थाहा हुँदैन हामीलाई
सहज-असहज बनेर पाइलामा
गतिशील भएर उर्लिदिँदा
बनिदिन्छ सृस्टिको नियम जस्तो
विद्यमान बगिदिने नदिहरुमा
जन्म र मृत्यु दुइ किनार भएर बगे जस्तो


समय
वलवान हुन्छ
रोकेर रोकिँदैन छेकेर छेकिदैन
त्यसैले घाम बन्छ कहिले सफलताको
औँसीको रात बन्छ कहिले असफलताको
फक्रिन्छ कहिले रङ्गीविरङ्गी फूल भएर वसन्तहरुमा
पोलिन्छ कहिले आगोको राप बनेर छातीहरुमा
धड्कन हो की कुन्नी
खुल्दुलीमा आँखा
जति च्यातेर हेरे पनि
देखिदैन कहीँ
हतारिएर जति भेट्न खोजे पनि
भेटिदैन कहीँ
व्यस्त-व्यस्त भैरहन्छ हरपलमा

समय
छाइरहन्छ सदैव दिनहरुमा, रातहरुमा
र स्पर्स गरिरहन्छ अनुभूतिहरुमा
विना आकृतिको भावना जस्तो
वर्तमान छचल्किरहन्छ भविष्यको पानीमा
रोकिदैन भुतकाल पहिरो गए जस्तो
पर्खदैन डुबी जाने घाम जस्तो ।

*****

 
(2)
जस्तै-जस्तै

सोचाईहरुको समस्थलीमा उभिएर
अन्दाज गर्दा उस्तै-उस्तै
जीवनको गहिराईमा डुबेर
वास्तविकतालाई छाम्दा
त्यस्तै-त्यस्तै
अब भिन्नता के भनौँ
समान मान्छे भएर जिउदाका क्षणहरु
एउटै आकास सबैले ओढे जस्तै-जस्तै
समयको चाल्नोबाट भाग्यवस
छानिएर बाँच्दा
आसाहरु बाँधिन्छन धेरै
जहाँ रङ्गिने सपनाको दुनिया
झन् हुन्छ उस्तै-उस्तै
र व्यवधानको सागरभरि मडारिने ज्वाराभाटा
त्यो पनि हुन्छ त्यस्तै-त्यस्तै
अपवादमा यो मन मुस्कुराउदा
लाग्छ मलाई सारा मुस्कुराए जस्तै-जस्तै

परिस्थितिवस वर्वादिएका पलहरु
अतीत बनेर भोग्नुपर्ने पीडाहरु
हुन्छन त्यस्तै-त्यस्तै
आफ्नाआफ्नै स्वाद हुन सक्ला
अनुभूतिहरुमा
तर दोहोरिएर आउने दिनहरु
हुन्छन सधैको जस्तै-जस्तै

नदीको प्रवाहसँग चालेका पाइलाहरु
यात्रामा अघिपछि भए पनि
हिँड्ने गोरेटोहरु हुन्छन् उस्तै-उस्तै
गाउवस्ती सहर जहाँ रहे पनि
प्रत्येकले व्यहोर्नु पर्ने अड्चनहरु
हुन्छन त्यस्तै-त्यस्तै
अन्तराल नै के छ भनौँ
मैले जिएको जिन्दगी
तिमीले भोगे जस्तै-जस्तै ।

*****